ჯული პეტერსონი: "ახალი მწარმოებლებისთვის აშშ-ის ბაზარზე დასამკვიდრებლად ახლა შესანიშნავი დროა"

18 დეკემბერი, 2019 13:10 ეკონომიკა & ბიზნესი


ღვინის ეროვნული სააგენტოს კონტრაქტორი, ამერიკული მარკეტინგული კომპანიის „მარქ ენერჯის“ ხელმძღვანელი ჯული პეტერსონი ქართული ღვინის 60-მდე კომპანიის წარმომადგენელს ღვინის ეროვნულ სააგენტოში შეხვდა და ამერიკის ღვინის ბაზრის შესახებ პრეზენტაცია წარუდგინა.  მან მწარმოებლებს ის ძირითადი საკითხები გააცნო, რომლებიც აშშ-ს ბაზარზე დასამკვიდრებლად გრძელვადიანი და მდგრადი გეგმის შესამუშავებლადაა საჭირო.
„დღევანდელი პრეზენტაცია ემსახურებოდა ქართველი ღვინის მწარმოებლების დახმარებას აშშ-ს ბაზარზე დასამკვიდრებლად ინდივიდუალური სტრატეგიების შემუშავებაში. აშშ-ს ღვინის ბაზარი მსოფლიოში უდიდესია და ყველაზე დიდი კონკურენცია ამ ბაზარზეა. ბოლო 4 წლის განმავლობაში ჩვენ ვიხილეთ ქართული ღვინის ექსპორტის ყოველწლიური 50%-იანი ზრდა აშშ-ს ბაზარზე. 20%-იანი ზრდა უკვე ითვლება ძალიან სწრაფ პროგრესად, აქედან გამომდინარე, 50 პროცენტი ძალიან კარგი მაჩვენებელია. ჩვენ გვსურს ვიხილოთ ამგვარი განვითარება მომდევნო 5 წლის განმავლობაშიც. ახალი მწარმოებლებისთვის აშშ-ის ბაზარზე დასამკვიდრებლად ახლა შესანიშნავი დროა,“ - აღნიშნა „მარქ ენერჯის“ ხელმძღვანელმა.
როგორც შეხვედრაზე ღვინის ეროვნული სააგენტოს მარკეტინგისა და საზოგადოებასთან ურთიერთობის დეპარტამენტის უფროსმა, ირაკლი ჩოლობარგიამ აღნიშნა, ამერიკის შეერთებული შტატები რჩება ქართული ღვინის სტრატეგიულ ბაზრად და 2020 წელს ამ ქვეყანაში ღვინის ეროვნული სააგენტო უფრო გააქტიურდება, როგორც აშშ-ში ქართული ღვინის წარდგენის, ისე ამერიკელი იმპორტიორებისა და ღვინის ექსპერტების საქართველოში ვიზიტების განხორციელების მიმართულებით.


წყარო: ღვინის ეროვნული სააგენტო

ღვინო აშშ

ბოლო სიახლეები