„Georgian Airways”-ი მიესალმება ლავროვის განცხადებას რუსეთ-საქართველოს შორის ფრენების აღდგენასთან დაკავშირებით

ავიაკომპანია "Georgian Airways"-- განცხადებას ავრცელებს. "ეკონიუსი" მის ტექსტს უცვლელად გთავაზობთ:

"რუსეთის საგარეო საქმეთა მინისტრის, სერგეი ლავროვის განცხადებას რუსეთ-საქართველოს შორის ფრენების აღდგენასთან დაკავშირებით, ავიაკომპანია „Georgian Airways”-ის ხელმძღვანელობა მიესალმება. მიგვაჩნია, რომ ორ ქვეყანას შორის ფრენები უნდა აღდგეს სამთავრობოთაშორისო ხელშეკრულების თანახმად, მისი ყველა მუხლის დაცვით, რათა რუსეთის მთავრობამ ცალმხრივად და უსაფუძვლოდ ვერ შეწყვიტოს ორ ქვეყანას შორის რეგულარული მიმოსვლა. ასევე, საავიაციო ხელისუფლებებს შორის, ფრენების აღდგენამდე წინასწარი მოლაპარაკებების დროს ქართულმა მხარემ პრინციპულად უნდა დაიცვას საქართველოს ინტერესები და რეგულარული ფრენები აღდგეს პარიტეტულ რეჟიმში.
აღსანიშნავია ისიც, რომ ფრენების შეწყვეტამდე ირღვეოდა ხელშეკრულების პრაქტიკულად ყველა პუნქტი და რუსული მხარე საქართველოში ფრენებს საკუთარი სურვილიდან გამომდინარე, ქართული კომპანიების ინტერესების საწინააღმდეგოდ ახორციელებდა. აქედან გამომდინარე, საქართველოს მთავრობამ რუსეთის საავიაციო ხელისუფლებასთან მოლაპარაკების დროს მაქსიმალურად უნდა დაიცვას ქართული მხარის ინტერესები, რათა არათანაბარ პირობებში არ აღმოჩნდეს ჩვენი ქვეყნისთვის სტრატეგიულად მნიშვნელოვანი სექტორი - საფრენოსნო ავიაცია.
საქართველოს მთავრობა მუდმივად აპელირებს ტურიზმის ხელშეწყობაზე, შესაბამისად, მათ რეალურად უნდა დაიცვან საქართველოს ტურიზმის სექტორის წარმომადგენლების ინტერესები, რადგან ტურიზმის განვითარება წარმოუდგენელია ქართული ავიაკომპანიის ხელშეწყობისა და გაძლიერების გარეშე, რუსეთის სადამსჯელო ღონისძიებები კი კონტრპროდუქტიულია. აღნიშნული ქმედებები ისეთი ეკონომიკური კონიუქტურის პირობებში როგორიც საქართველოშია ავიაკომპანიას უქმნის ლიკვიდობის პრობლემას და ხელს უწყობს მის გაკოტრებას.

გენერალური დირექტორი
რომან ბოკერია".

 

შეგახსენებთ, რომ რუსეთის ფედერაციის პრეზიდენტის, ვლადიმერ პუტინის ბრძანებით, რუსულ ავიაკომპანიებს საქართველოს მიმართულებით პირდაპირი ფრენების შესრულება 8 ივლისიდან აეკრძალათ. რუსეთის ფედერაციის საგარეო საქმეთა მინისტრმა სერგეი ლავროვმა კი ახლახან განაცხადა, რომ არ არის ფრენების განახლების წინააღმდეგი.

 

რუსეთი ავიაცია