ქუთაისში მოსულმა უხვმა ნალექმა რამდენიმე ოჯახი დააზარალა

ქუთაისის მერი გიორგი ჭიღვარია და ვიცე-მერი დავით ერემეიშვილი იმ ოჯახებში იმყოფებოდნენ, რომლებიც სტიქიის შედეგად დაზარალდნენ. სიტუაციას ადგილზე მათთან ერთად საგანგებო შტაბის წევრებიც ეცნობოდნენ. ამ დროისათვის მიმდინარეობს სამაშველო სამუშაოები. ყველა შესაბამისი სამსახური საგანგებო რეჟიმში მუშაობს.

შეიქმნება სპეციალური კომისია, რომელიც ზარალს დათვლის. უხვი ნალექი ქუთაისში რამდენიმე საათის წინ მოვიდა, რამაც ქალაქს სერიოზული პრობლემები შეუქმნა. წინასწარი ინფორმაციით, დაზარალდა რამდენიმე ოჯახი. წყლით, უმთავრესად, საცხოვრებელი სახლების სარდაფები და  პირველი სართულები დაიტბორა.

,,უკვე რამდენიმე საათია საგანგებო რეჟიმში მუშაობს მერიის ყველა სამსახური. თანამშრომლები ადგილზე გადიან ყველგან, სადაც ცხელი ხაზით ფიქსირდება გამოძახება. მოგვიანებით დაიწყება ზარალის დათვლა. მაქსიმალურს ვაკეთებთ იმისთვის, რომ დროულად მოხდეს დაზარალებული ოჯახების დახმარება, წყლის ამოტუმბვა სახლებიდან და სარდაფებიდან," - განაცხადა ქუთაისის მერმა გიორგი ჭიღვარიამ.