საქართველოს საელჩო სლოვაკეთში ქვეყანაში შესვლის რეგულაციებს განმარტავს
საქართველოს საელჩო სლოვაკეთში განცხადებას ავრცელებს:
"საქართველოს მოქალაქეების საყურადღებოდ,
სლოვაკეთის ჯანდაცვის ეროვნული სააგენტოს ინფორმაციით, ნებისმიერი პირი, მათ შორის უცხო ქვეყნის მოქალაქე, რომელიც 2020 წლის 6 ივლისის შემდეგ სლოვაკეთის რესპუბლიკის საზღვარს გადაკვეთს ავსტრიის, ჩეხეთის, უნგრეთის ან პოლონეთის სახმელეთო ან საჰაერო გზით და რომელსაც ბოლო 14 დღის განმავლობაში ექნება ეპიდემიოლოგიური თვალსაზრისით ე.წ. „მაღალი რისკის“ მქონე ქვეყანაში მოგზაურობის ისტორია, დაექვემდებარება სავალდებულო თვითიზოლაციას, იქამდე, სანამ არ ექნება COVID-19 ტესტის ნეგატიური პასუხი. აღნიშნულმა პირებმა კონტაქტი უნდა იქონიონ ჯანდაცვის სისტემის შესაბამის ორგანოსთან და სლოვაკეთში შემოსვლიდან მეხუთე დღეს ჩაიტარონ სავალდებულო ტესტი.
სლოვაკეთის მთავრობის გადაწყვეტილებით ე.წ. „დაბალი რისკის“ ქვეყნებს მიეკუთვნებიან: ავსტრალია, ავსტრია, ბელგია კვიპროსი, ჩინეთი, ჩეხეთი, დანია, ესტონეთი, ფაროს კუნძულები, საფრანგეთი, საბერძნეთი, ხორვატია, ისლანდია, ირლანდია, იტალია, იაპონია, ლიხტენშტეინი, ლიტვა, ლატვია, უნგრეთი, მალტა, მონაკო, ნიდერლანდები, ახალი ზელანდია, გერმანია, ნორვეგია, პოლონეთი, სლოვენია, სამხრეთ კორეა, ესპანეთი და შვეიცარია.
ფრენები სლოვაკეთის მიმართულებით აკრძალულია მსოფლიოს სხვა დანარჩენი ქვეყნებიდან.
ივლისის თვის დასაწყისში სლოვაკეთის რესპუბლიკაში კორონა ვირუსის ინფექციის შემთხვევების ზრდასთან დაკავშირებით, ქვეყნის მთავრობამ და პრემიერ-მინისტრმა მიიღეს ვირუსთან ბრძოლის წინააღმდეგ ზომების გამკაცრების გადაწყვეტილება. აღნიშნული ეხება სლოვაკეთის ტერიტორიაზე სხვა ქვეყნებიდან შემოსული მოქალაქეების ვალდებულებას, რომლის მიხედვითაც დამალვა ე.წ. „მაღალი რისკის“ მქონე ქვეყანაში მოგზაურობის ისტორიის ან ხუთ დღიანი სავალდებულო იზოლაციის (COVID-19-ის ტესტის ჩატარებამდე) დარღვევა, დაისჯება 5000 ევროს ოდენობის ჯარიმით. აღსანიშნავია, რომ ეს ჯარიმა აქამდე 1650 ევროს შეადგენდა. ასევე, სახელმწიფოს ეძლევა სხვა ქვეყნიდან დაბრუნებული მოქალაქეების მობილურ ტელეფონებზე წვდომის უფლება.
ტელეფონზე შეტყობინების გაგზავნის საშუალებით ქვეყნის ჯანდაცვის ეროვნული სააგენტო მოქალაქეებს კიდევ ერთხელ მოუწოდებს თვითიზოლაციის და წესების დაცვის აუცილებლობისაკენ.
სლოვაკეთის საგარეო და ევროპულ საქმეთა სამინისტროს განცხადებით, წესების არ-დამორჩილების შემთხვევაში სასჯელი შეიძლება კიდევ უფრო გამკაცრდეს და გამოიხატოს მოქალაქისთვის თავისუფლების აღკვეთით.
საქართველოს საელჩო მოგიწოდებთ მაქსიმალურად დაიცვათ არსებული რეგულაციები.
