არჩილ თალაკვაძემ საშემოდგომო სესიის ათი მთავარი გამოწვევა წარმოადგინა

„მინდა წარმოგიდგინოთ ის ათი მთავარი გამოწვევა და მთავარი საკითხი, რაზეც საქართველოს პარლამენტი საშემოდგომო სესიის განმავლობაში იმუშავებს. ეს იქნება ერთერთი ყველაზე საინტერესო სესია და მე შევეცდები, რომ პერიოდულად ანგარიში ჩაგაბაროთ ჩვენს საქმიანობასთან დაკავშირებით“, - საქართველოს პარლამენტის თავმჯდომარემ, არჩილ თალაკვაძემ საშემოდგომო სესიის ათი ყველაზე მნიშვნელოვანი გამოწვევის პრეზენტაცია გამართა.

საარჩევნო რეფორმა

„ამ საკითხზე ჩვენ, სამოქალაქო საზოგადოებასთან, ოპოზიციასთან და ჩვენს საერთაშორისო პარტნიორებთან ერთად ვმუშაობთ. მაქსიმალურად ვეცდებით ეს რეფორმა წარმატებით დავხუროთ საშემოდგომო სესიაზე“, - განაცხადა არჩილ თალაკვაძემ.

პარლამენტის თავმჯდომარემ, საარჩევნო რეფორმაზე საუბრისას ასევე განმარტა, რომ პროპორციული სისტემით არჩევნების ჩატარების გადაწყვეტილება ხელისუფლებას ჯერ კიდევ ერთი წლის წინ ჰქონდა მიღებული და სწორედ საზოგადოების მოთხოვნის გათვალისწინებით მოხდა თარიღის გადმოწევა 2020 წლისთვის.

მისივე განცხადებით, საარჩევნო რეფორმის თვალსაზრისით ძალიან მნიშვნელოვანი ცვლილებები იგეგმება კანონმდებლობაში.

„ეს არის პარტიების დაფინანსების მოდელის შეცვლა უფრო სამართლიანი, უფრო ობიექტური, უფრო გამჭვირვალე მოდელით. ეს არის ცვლილებები პარტიების რეგისტრაციასთან და კამპანიის ჩატარებასთან დაკავშირებით. ყველა ამ საკითხზე ჩვენ, სამოქალაქო საზოგადოებასთან, ოპოზიციასთან და ჩვენს საერთაშორისო პარტნიორებთან ერთად ვმუშაობთ. მაქსიმალურად ვეცდებით ეს რეფორმა წარმატებით დავხუროთ საშემოდგომო სესიაზე“, - განაცხადა არჩილ თალაკვაძემ.

სასამართლოს რეფორმა

პარლამენტის თავმჯდომარემ საშემოდგომო სესიის მეორე და მნიშვნელოვან გამოწვევად სასამართლოს რეფორმა დაასახელა.

„დამოუკიდებელი სასამართლო, სანდო მართლმსაჯულება არის ჩვენი მოქალაქეებისთვის ძალიან მნიშვნელოვანი. ამიტომ, საშემოდგომო სესიის ფარგლებში ჩვენ სასამართლო რეფორმის მეოთხე ტალღას განვახორციელებთ, სადაც ძალიან მნიშვნელოვანი თემები შედის. ეს არის იუსტიციის უმაღლესი სკოლის რეფორმა, სასამართლოებში მოსამართლეთა დანიშვნის წესი, პროცესის უკეთ ორგანიზება და დარეგულირება. ეს არის დისციპლინური სამართალწარმოება და იუსტიციის უმაღლესი საბჭოს ანგარიშვალდებულება“, - განაცხადა არჩილ თალაკვაძემ.

პარლამენტის თავმჯდომარის განცხადებით, ორშაბათიდან იწყება კანდიდატურების განხილვა და პარლამენტი უზრუნველყოფს დემოკრატიულ და მაქსიმალურად გამჭვირვალე პროცესს. ყველა მოქალაქეს ექნება საშუალება თვალი ადევნოს მოსამართლეთა შერჩევის პროცესს და იმ გადაწყვეტილებებს, რასაც პარლამენტი მიიღებს ამ საკითხთან დაკავშირებით.

ევროპული და ევროატლანტიკური ინტეგრაცია

„ევროპული და ევროატლანტიკური ინტეგრაცია არის პარლამენტის საშემოდგომო სესიის ერთერთი გამოწვევა და ამ მიმართულებით, პარლამენტს, საკმაოდ ამბიციური გეგმები აქვს,“ - განაცხადა არჩილ თალაკვაძემ. მისი თქმით, იგეგმება უფრო ეფექტური გახდეს პარლამენტთაშორისი თანამშრომლობა ევროკავშირის წევრი ქვეყნების პარლამენტებთან. საშემოდგომო სესიის განმავლობაში პარლამენტის წევრები აქტიურ მონაწილეობას მიიღებენ საერთაშორისო საპარლამენტო ასამბლეებში და ამ ფორმატებში.

„ევროპული და ევროატლანტიკური ინტეგრაციის პროცესში ძალიან მნიშვნელოვანი საქმე ეს არის კანონმდებლობის ჰარმონიზაცია, რომ ჩვენი კანონმდებლობა ევროპულ კანონმდებლობასთან გახდეს შესაბამისი და რა თქმა უნდა აეს უნდა გავაკეთოთ ისე, რომ ეს ჩვენი ქვეყნის და ჩვენი საზოგადოების ინტერესებზე იყოს მორგებული“, - განაცხადა პარლამენტის თავმჯდომარემ.

საპარლამენტო ზედამხედველობა

საშემოდგომო სესიის გამოწვევებზე საუბრისას, პარლამენტის თავმჯდომარემ საპარლამენტო ზედამხედველობის მნიშვნელობაზე და მის ეფექტურად განხორციელების ახალ საპარლამენტო ინსტრუმენტებზე ისაუბრა.

პარლამენტის თავმჯდომარემ მედიას და საზოგადოებას საპარლამენტო ზედამხედველობის ფორმები და ინსტრუმენტები დეტალურად წარუდგინა.

„ეს არის ინტერპელაცია, რაზეც პარლამენტი უსვამს კითხვას მთავრობას, პრემიერ-მინისტრს და მინისტრებს. ჩვენ გვინახავს უკვე პარლამენტში პრემიერ-მინისტრი, როდესაც პლენარულ სესიაზე ამ კითხვებს პასუხობდა. ამ ინსტრუმენტს ჩვენ აქტიურად გამოიყენებთ საშემოდგომო სესიის ფარგლებში. ეს არის თემატური მოკვლევები. უკვე გააკეთეს კომიტეტებმა რამდენიმე მნიშვნელოვანი და საინტერესო მოკვლევა. ჩვენ გვაქვს მინისტრის საათის ფორმატი. გუშინ ვუსმენდით კაბინეტის წევრს და ნახეთ მთელი დღის განმავლობაში პარლამენტს აქვს საშუალება, რომ ნებისმიერი შეკითხვა დაუსვას კაბინეტის ნებისმიერ წევრს და საზოგადოებამ მიიღოს იმ კითხვებზე პასუხები, რომელიც აინტერესებს. ჩვენ გვაქვს საპარლამენტო კონტროლის ძლიერი მექანიზმები, ეს არის სახალხო დამცველის ოფისი და აუდიტის სამსახური. მე ვფიქრობ და ჩვენ ამაზეც შეთანხმებულები ვართ, რომ აუდიტის და აუდიტორის ანგარიშები ბევრად აქტიურად იქნება გამოყენებული საშემოდგომო სესიაზე. ბიუჯეტის და ჩვენი საზოგადოების გადასახადების ეფექტიანი ხარჯვა არის ის მნიშვნელოვანი საკითხი, რომელსაც მეტი ყურადღება სჭირდება მომავალში. ჩვენ გვაქვს საკომიტეტო მოსმენები, ძალიან აქტიური მუშაობა იქნება ამ კუთხით, ჩვენ გვაქვს ნდობის ჯგუფი, რომელიც ახლა განახლდა და ნდობის ჯგუფიც გააკეთებს თავის მაქსიმუმს იმისათვის, რომ უსაფრხოების სექტორი და ძალოვანი სექტორი იყოს მაქსიმალური ზედამხედველობის ქვეშ“, - განაცხადა არჩილ თალაკვაძემ.

ბიუჯეტი

„კოლოსალური სამუშაოა გასაკეთებელი საშემოდგომო სესიაზე, რომ მივიღოთ დაბალანსებული ბიუჯეტი. მივიღოთ ისეთი ბიუჯეტი, რომელიც შეესაბამება ჩვენი ქვეყნის მაკროეკონომიკურ მონაცემებს. მივიღოთ ბიუჯეტი, რომელიც იქნება თითოეული ჩვენი მოქალაქის ბიუჯეტი, სადაც თავის თავს ყველა მოქალაქე დაინახავს. თავის თავს დაინახავენ სტუდენტები და ახალგაზრდები. განათლებაში ჩვენ ვაპირებთ ბიუჯეტის ძალიან სოლიდური ნაწილის ჩადებას. თავის თავს დაინახავენ პენსიონერები, რადგან ჩვენ გვინდა მხარი დავუჭიროთ პენსიების საკმაოდ ხელშესახებ გაზრდას მომავალი წლიდან. თავის თავს დაინახავენ სპორტსმენები და სპორტის კომიტეტს აქვს ძალიან მნიშვნელოვანი გეგმა სპორტულ ინფრასტრუქტურასთან დაკავშირებით“, - ასე წარუდგინა მედის და საზოგადოებას პარლამენტის თავმჯდომარემ საშემოდგომო სესიის ერთერთი მნიშვნელოვანი გამოწვევა, 2020 წლის ბიუჯეტი.

არჩილ თალაკვაძის განცხადებით, მნიშვნელოვანია რომ ახალი ბიუჯეტი გახდეს კიდევ უფრო სოლიდარული და საზოგადოების საჭიროებებზე მორგებული.

ტერიტორიული მთლიანობა და ანტისაოკუპაციო პოლიტიკა

პარლამენტის თავმჯდომარემ ტერიტორიული მთლიანობასა და ანტისაოკუპაციო პოლიტიკაზე საუბრისას განაცხადა, რომ ეს არის ქვეყნის ყველაზე მნიშვნელოვანი გამოწვევა და პარლამენტი ამ მიმართულებით, საშემოდგომო სესიის განმავლობაში, პრაქტიკულ გადაწყვეტილებებს მიიღებს. არჩილ თალაკვაძემ ისაუბრა საკანონმდებლო ცვლილებებზე, რომელიც ითვალისწინებს საოკუპაციო ზოლთან განლაგებული სოფლების მცხოვრებთა მხარდაჭერას.

„ჩვენ, რა თქმა უნდა, მხარს ვუჭერთ ჩვენს პასუხისმგებლიან პოლიტიკას დეოკუპაციასთან და ტერიტორიულ მთლიანობასთან დაკავშირებით. ჩვენ არ გვაქვს უფლება რამე ემოციური გადაწყვეტილებით კითხვის ნიშნის ქვეშ დავაყენოთ ჩვენი მშვიდობა, უსაფრთხოება და მომავალი. ამიტომ, გზა, რომელიც ჩვენ დავისახეთ, ეს არის პრაგმატული და პასუხისმგებლიანი პოლიტიკა და ბუნებრივია, სხვა ალტერნატივა, გარდა მშვიდობიანი განვითარების, ჩვენი ინსტიტუტების გაძლიერების, ტერიტორიული უსაფრთხოების აღსადგენად, ჩვენ არ გვესახება. ამაში საზოგადოების მაქსიმალურ მხარდაჭერას ველით მომავალში“, - განაცხადა პარლამენტის თვმჯდომარემ.

გარემო და ეკოლოგია

„ტყის კოდექსთან ერთად, პარლამენტი აპირებს, რომ უფრო ეფექტური გარანტიები შექმნას და უფრო მეტად შეუწყოს ხელი ბუნებრივი რესურსების რაციონალურ გამოყენებას, ასევე, ჩვენი ბუნებრივი რესურსების გრძელვადიან დაცვასა და განვითარებას“, - განაცხადა არჩილ თალაკვაძემ.

პარლამენტის თავმჯდომარემ, გარემოსა და ეკოლოგიის მიმართულებით, საპარლამენტო გამოწვევებზე საუბრისას, ყურადღება გაამახვილა დაგეგმილ საკანონმდებლო ცვლილებებზე მწარმოებელთა ვალდებულებების და ავტომანქანათა ტექნიკური დათვალიერების ეფექტური საკანონმდებლო მონიტორინგის კუთხით.

ბავშვის უფლებები

„ბავშვის უფლებები იქნება ერთერთი პრიორიტეტი, რაზეც პარლამენტი გააგრძელებს მუშაობას და კანონის მიღების შემდეგ, საშემოდგომო სესიის ფარგლებში, ჩვენ, აქტიურ მონიტორინგს გავუწევთ თუ როგორ ეფექტურად სრულდება ბავშვის უფლებებთან დაკავშირებული რეგულაციები“, - განაცხადა არჩილ თალაკვაძემ. მისივე თქმით, „ბავშვის კოდექსი“, რომელიც სწორედ გუშინდელ სხდომაზე მიიღო პარლამენტმა, მხარდაჭერილია საერთაშორისო პარტნიორების და ბავშვის უფლებების დამცველი ორგანიზაციების მიერ, ვინაიდან ის აწესებს უფრო მაღალ სოციალურ გარანტიას და მეტ დაცვას ბავშვებისთვის. არჩილ თალაკვაძემ სპეციალური საჭიროებების ბავშვთა უფლებების კუთხით განსახორციელებელ საკანონმდებლო ცვლილებებზეც გაამახვილა ყურადღება.

ბიზნესის მხარდაჭერა

საშემოდგომო სესიის კიდევ ერთ მნინელოვან გამოწვევად, საქართველოს პარლამენტის თავმჯდომარემ ბიზნესის მხარდაჭერა და ამ მიმართულებით, საკანონმდებლო ცვლილებების განხორციელება დაასახელა.

„ჩვენ, ბიზნესთან ერთად განვიხილავთ ყველა იმ პრაქტიკულ გადაწყვეტილებას კანონმდებლობაში, რომელიც შესაძლოა ბიზნესს დაეხმაროს ექსპორტის გაზრდაში, შიდა მოთხოვნების დაკმაყოფილებაში, დაეხმაროს იმაში, რომ ბიუროკრატია იყოს უფრო ეფექტური და ადმინისტრირება იყოს მათი ხელშემწყობი და არა დამაბრკოლებელი. ამ კუთხით ვგეგმავთ, რომ თითოეული კანონი, რომელიც შესაძლოა ბიზნესზე ახდენდეს გავლენას, იქნება ეს დადებითი თუ უარყოფითი, ბიზნესთან ერთად იყოს განხილული და მხოლოდ შემდეგ მივიღოთ გადაწყვეტილებები, რომელიც ბიზნესს უნდა დაეხმაროს“, - განაცხადა არჩილ თალაკვაძემ.

სოფლის მეურნეობის ხელშეწყობა

სოფლის მეურნეობის ხელშწყობის მიმართულებით, არჩილ თალაკვაძემ მიწის რეფორმის ეფექტური აღსრულების მექანიზმებზე და საჭიროებებზე გაამახვილა ყურადღება. მისი თქმით, პარლამენტმა „სასოფლო-სამეურნეო მიწის შესახებ“ კარგი კანონი მიიღო და ამ კანონს რეალურ ცხოვრებაში კარგი აღსრულება სჭირდება.

„მას სჭირდება ინსტიტუციური გაძლიერება და რაც მთავარია, სჭირდება, რომ ეს კანონი ჩვეულებრივმა მოქალაქეებმა, ფერმერებმა, ადამიანებმა, ვინც მიწას ამუშავებენ, გამოიყენეონ. მიწის რეფორმა უნდა იყოს ბოლომდე მიყვანილი და ჩვენ საშემოდგომო სესიაზე მაქსიმალურად დავეხმარებით მთავრობას, რომ ეს კანონმდებლობა განახორციელოს წარმატებით“, - განაცხადა არჩილ თალაკვაძემ.

პარლამენტის თავმჯდომარემ ქარსაცავი ზოლების და სურსათის უვნებლობის მიმართულებით არსებულ საკანონმდებლო მხარდაჭრაზეც გაამახვილა ყურადღება.

არჩილ თალაკვაძის განცხადებით, პარლამენტი წარმოდგენილ გამოწვევებზე და თემებზე საშემოდგომო სესიის განმავლობაში დიდი დატვირთვით იმუშავებს. პარლამენტის თავმჯდომარე საპარლამენტო საქმიანობასთან დაკავშირებით, მედიას და საზოგადოებას პერიოდულად ანგარიშს წარუდგენს.