არჩილ თალაკვაძე: 2020 წლის სახელმწიფო ბიუჯეტის შემუშავების პროცესში მოქალაქეები მაქსიმალურად უნდა ჩავრთოთ

პარლამენტის ბიუროს სხდომაზე 1 - 4 ოქტომბრის პლენარული სხდომების დღის წესრიგი განიხილეს და ახალ საკანონმდებლო ინიციატივებზე წამყვანი და სავალდებულო კომიტეტები განსაზღვრეს. პლენარული სხდომებზე განსახილველ საკითხებს 2 საკითხი დაემატა: „სივრცითი დაგეგმვისა და არქიტექტურულ და სამშენებლო საქმიანობის კოდექსში ცვლილების შეტანის შესახებ, გამომდინარე კანონპროექტთან ერთად და „ლიცენზიებისა და ნებართვების შესახებ“ საქართველოს კანონში ცვლილების შეტანის შესახებ“.

პარლამენტის თავმჯდომარემ, არჩილ თალაკვაძემ ბიუროს სხდომაზე ქუთაისის საერთაშორისო უნივერსიტეტის მნიშვნელობაზე გაამახვილა ყურადღება.

მისი განცხადებით, ეს არის მომავლის პროექტი. „ბატონ ბიძინა ივანიშვილსა და მის ოჯახს ეკუთვნის მადლობა, რომ უპრეცედენტო ქველმოქმედებას აკეთებენ და ამ საქმეს დაუდგნენ გვერდით. ქუთაისის საერთაშორისო უნივერსიტეტი ქმნის ახალ შესაძლებლობებს მომავალი თაობებისთვის, ქმნის სრულიად ახალ ეკონომიკას, ახალ მეცნიერებას, ახალ კავშირებს ჩვენი ქვეყნისთვის. მნიშვნელოვანია, რომ ამით სრულდება ჩვენი პოლიტიკური გუნდისა და ხელისუფლების ის პირობაც, რომელიც იმერეთისა და ქუთაისის საზოგადოებას მივეცით, როდესაც პარლამენტთან დაკავშირებით გადაწყვეტილება მივიღეთ. ქუთაისის მომავალი განვითარებისთვის ეს პროექტი ძალიან მნიშვნელოვანია. მთელი მსოფლიოს მოწინავე მეცნიერები, პროფესორები ამ უნივერსიტეტში ლექციებს წაიკითხავენ და სტუდენტები აქ მიიღებენ ცოდნას, რომელიც მათ ბევრ უპირატესობას მოუტანს ცხოვრებაში; ეს არის ახალი სამუშაო ადგილები, ახალი შესაძლებლობები და კავშირი მსოფლიოსთან ჩვენი ახალგაზრდებისთვის. ამ პროექტს პარლამენტის მხრიდან სრული მხარდაჭერა აქვს და ექნება მომავალშიც“ , - აღნიშნა არჩილ თალაკვაძემ.

ბიუროს სხდომაზე მთავრობის მიერ წარმოდგენილი 2019 წლის სახელმწიფო ბიუჯეტში შესატანი ცვლილებების პროექტის შესახებ საფინანსო-საბიუჯეტო კომიტეტის თავმჯდომარემ, ირაკლი კოვზანაძემ ისაუბრა. მისი ინფორმაციით, მნიშვნელოვანი ცვლილებებია ასიგნებების ნაწილში.

„პროექტით გათვალისწინებულია ზრდა 223 მლნ-ის ფარგლებში და ასიგნებები აღწევს 13მლრდ 113მლნ-ს. არის ზრდა რამდენიმე სამინისტროში, კერძოდ, განათლების სამინისტროში, ჯანდაცვის სამინისტროსა და იუსტიციის სამინისტროში. გაზრდილია თბილისისა და რეგიონების ფონდი“, - განაცხადა ირაკლი კოვზანაძემ. მისი ინფორმაციით, განხილვები გრაფიკის მიხედვით 25 სექტემბერს დაიწყება და 18 ოქტომბრამდე დასრულდება.

„თითოეული მუხლი, თითოეული პუნქტი, როდესაც ახალი ბიუჯეტის ფორმირება მოხდება, მოქალაქეებისთვის უნდა იყოს სათანადოდ განმარტებული. ჩვენი მიზანია, რომ სახელმწიფო ბიუჯეტში თითოეულმა მოქალაქემ დაინახოს თავისი თავი, ჰქონდეს განცდა, რომ ეს მისი ბიუჯეტიც არის, რომელიც მისი გადასახადებისგანაც შედგება“, - განაცხადა საქართველოს პარლამენტის თავმჯდომარემ.

არჩილ თალაკვაძემ კომიტეტებს მოუწოდა, დამატებით იმსჯელონ, რა დამატებითი ღონისძიებები შეიძლება გააკეთონ, რომელიც ახალი ბიუჯეტის ფორმირების პროცესში მოქალაქეთა ჩართულობას შეუწყობს ხელს.

„მნიშვნელოვანია, რომ სოციალურად დაუცველმა ჩვენმა თანამოქალაქეებმაც მკაფიოდ და გასაგებად გაიგონ, თუ რა ცვლილებები და რა სიახლეები იქნება მათთვის 2020 წლის ბიუჯეტში გათვალისწინებული. ამისთვის მოგვიწევს დამატებით მსჯელობა, თუ რა შეიძლება გავაკეთოთ პარლამენტმა გარდა საკომიტეტო განხილვებისა, რომ მეტი კომუნიკაცია შედგეს ჩვენს მოქალაქეებთან. გთხოვთ, მოვემზადოთ ამ სამუშაო შეხვედრისთვის“, - განაცხადა პარლამენტის თავმჯდომარემ.